Der Spiegel. Եգիպտոսում ծայր է առել Մուբարաքի անկումից ի վեր ամենազանգվածային ցույցը

Իրավիճակը Կահիրեում շարունակում է թեժանալ: Մուհամմեդ Մուրսիի դեմ բռնկված նոր բողոքի ցույցերն ընդհանուր առմամբ արդեն 3 մարդու կյանք են խլել: Պետության ղեկավարի դեմ բեղեքող 56-ամյա մի տղամարդ է զոհվել ոստիկանության կողմից արձակած արցունքաբեր գազի արդյունքում: Այս փաստը հաստատում են բժիշկներն ու ցուցարարները:

Թահրիր հրապարակում և դրան հարակից փողոցներում, ցույցի մասնակիցների գնահատմամբ, ավելի քան 300.000 ցուցարար է մասնակցել: Դա մեծագույն բողոքի ցույցն է նախկին նախագահ Մուբարաքի անկումից ի վեր: Բողոքի ալիք է բռնկվել նաև Եգիպտոսի այլ քաղաքներում: Փողոցներում ցույցի են դուրս եկել հակամուրսիական և մուրսիամետ ուժերը:

Ցույցերի ծավալման վերջին օրերի ընթացքում ոստիկանության կողմից արդեն ձերբակալվել է 348 մարդ: Ոստիկանության տվյալներով՝ բախումներից տուժել է ոստիկանության 216 աշխատակից:

Բողոքողների հիմնական նպատակը Մուրսիին ներկայացրած պահանջն է՝ չեղյալ հայտարարել իր լիազորությունների ընդլայնման մասին ցուցումը:

Հիշեցնենք, որ ըստ նրա նոր ցուցումների՝ նա կարող է ցանկացած ցուցում տալ, որն անհրաժեշտ է հեղափոխության պաշտպանության համար: Ընդ որում, նրա ստորագրած ցանկացած որոշում բողոքարկման ենթակա չէ: Նշենք, որ դատարանն այլևս չի կարող ազատ արձակել խորհրդարանի վերին պալատն ու Սահմանադրական ասամբլեան:

Նման անսահմանափակ իրավունքների դեմ բողոքել են ոչ միայն ընդդիմադիրները, այլև դատավորները: Առաջին անգամ պատմության մեջ Եգիպտոսի դատարանը պատրաստվում է իմպիչմենտ հայտարարել Եգիպտոսի նախագահին:

Միաժամանակ Մուրսիի կողմնակիցները նույնպես փողոց են դուրս եկել՝ պաշտպանելով նախագահի որոշումը: Նրանք կողմ են, որ Մուբարաքի ժամանակ արգելված «Մուսուլման եղբայրներ» շարժումը շարունակի երկրի հետագա իսլամականացումը: