Արարատ քաղաքում ադրբեջանական կոնֆետ չի՞ վաճառվել (լրացված)

Արարատի մարզի Արարատ քաղաքի «Արարատ» անվամբ խանութում վաճառվում է ադրբեջանական արտադրության «Best cherry» անվամբ կոնֆետ: Այս մասին հայտնում է Իրավաբան.net-ը։

Լուրեր.com-ը զրուցեց Հայաստանի սպառողների միության նախագահ Արմեն Պողոսյանի հետ, ով նշեց, որ ՀՀ կառավարությունն ունի որոշում՝ անվտանգության սկզբունքներից ելնելով՝ արգելել թուրքական և ադրբեջանական ծագման սննդի ներկրումը Հայաստան։

«Այդ որոշումն ընդունվել է 4-5 տարի առաջ։ Այն, որ հայտնվել է ադրբեջանական կոնֆետ, իմ համոզմամբ՝ անհատական ճամպրուկով բերված խմբաքանակ է, ոչ թե օրինական, մաքսային սահմանը հատած ապրանք»,-ասաց Պողոսյանը։

Պողոսյանի կարծիքով՝ պետք չէ սպառողներին ահաբեկել։

«Մենք դեռևս 2001-ին կոչ ենք արել՝ «ո՛չ թուրքական ու ադրբեջանական ապրանքներին», մենք հիմա էլ շարունակում ենք այդ կոչն անել, բայց ոչ նրա համար, որ թուրքական կոշիկը կամ կոնֆետը վտանգավոր է, այլ նրա համար, որ դա թուրքական է։ Սա բարոյական և արժանապատվության խնդիր է»,-ասաց նա։

Նշենք, որ ՀՀ գյուղատնտեսության նախարարության սննդամթերքի անվտանգության պետական տեսչության լրատվության բաժնից Իրավաբան.net-ի լրագրողին հայտնել են, որ Հայաստան մտնող ցանկացած սննդամթերք սահմանին ստուգվում է և նոր ներմուծվում: Մինչդեռ տեսչությունում տեղյակ չէին, որ խանութներում ադրբեջանական արտադրության կոնֆետ է վաճառվում:

Իսկ խանութի սեփականատերը լրագրողին հայտնել է, թե ինքը մեկնել է Վրաստան՝ ավտոմեքենա գնելու, և իր հետ բերել է նաև 5 կիլոգրամ կոնֆետ, որը վաճառում է խանութում: Նրա խոսքով՝ սահմանում որևէ խնդիր չի առաջացել: Ասվածը համապատասխանում է իրականությանը, թե՝ ոչ, կպարզի տեսչությունը:

Քիչ առաջ Իրավաբան.net–ի հետ զրույցում ՀՀ գյուղատնտեսության նախարարության ծառայության հասարակայնության հետ կապերի բաժնի պետ Բաբկեն Պիպոյանն ասել է, որ սննդի անվտանգության պետական ծառայության տեսուչը խանութում ադրբեջանական կոնֆետ չի հայտնաբերել: