Անգլիայում 10 քոլեջ կստանա համալսարանի կարգավիճակ

Մեծ Բրիտանիայի գիտության և համալսարանների հարցերով նախարար Դեվիդ Ուիլիթսը երեկ հայտարարել է, որ խորհուրդ է տալիս Կրթության հարցերով խորհրդին բարձրացնել Անգլիայի 10 ուսումնական հաստատությունների կարգավիճակը համալսարանի աստիճանի. այս մասին հաղորդում է BBC News-ը։ Ըստ ձևավորված ավանդույթի՝ խորհուրդը նման հարցերում նախարարին չի մերժում և ֆորմալ որոշում է կայացնում կարգավիճակի համապատասխան փոփոխության մասին։

Նոր համալսարանների ցուցակում են հայտնվել բարձր մակարդակի մասնագետներ պատրաստող և բազում տարիների պատմություն ունեցող քոլեջներ՝ ինչպես մասնավոր, այնպես էլ պետական։ Վերջին անգամ կարգավիճակի նման բարձրացում տեղի էր ունեցել 20 տարի առաջ։

Բրիտանական իշխանությունների կարծիքով՝ նման քայլը կօգնի բազմազան դարձնել համալսարանական կրթության համակարգը, բարձրացնել մրցունակությունը և հասնել ուսանողների կրթության որակի բարձրացման։ Համալսարանների թվի աճին նպաստել է նաև նման քոլեջների՝ համալսարանի կարգավիճակ ստանալու համար կոշտ չափանիշների թուլացումը։ Եթե ավելի վաղ դրա համար շարունակաբար սովորող  առնվազն 4000 ուսանող էր պահանջվում, ապա այժմ բավական է անգամ 1000 ուսանողը։

Թվով 10 քոլեջներին համալսարանի կարգավիճակի ընձեռման պաշտոնական արարողությունը կկայանա մոտակա շաբաթների ընթացքում։