GQ. Ռոմնին, Միշել Օբաման և Մադոննան՝ տարվա ամենաանհաջողակներ

GQ տղամարդկանց հայտնի պարբերականի կազմած՝ տարվա ամենաանհաջողակ հայտնիների ցանկում են հայտնվել ԱՄՆ-ի առաջին տիկին Միշել Օբաման, ԱՄՆ-ի նախագահական ընտրություններում պարտություն կրած Միթ Ռոմնին և փոփ թագուհի Մադոննան։ Սպիտակ տան տիրուհին հայտնվել է ցանկում, պարբերականի գնահատմամբ, առողջ սննդի մասսայականացման և թարմ բանջարեղենի աճեցման չկայացած նախաձեռնության համար, ինչի մասին Միշելն անգամ գիրք է հրատարակել։ Սակայն ազգն, այնուամենայնիվ, չոգեշնչվեց Միշել Օբամայի այս գաղափարներով և չսկսեց նիհարել։

Անդրադառնալով նախագահական ընտրություններին պարտված Միթ Ռոմնիին՝ պարբերականը գրում է. «Ռոմնին կարողացավ ոգեշնչել միայն սևամորթ երգիծաբաններին՝ ծաղրելու սպիտակ հերոսներին»։

Իսկ երգչուհի Մադոննային GQ ամսագիրը քննադատել է հին ալբոմների երգերի կատարման և դեռահասներին բնորոշ պարզամիտ հանդերձների համար, որոնցով փոփ թագուհին բեմ է բարձրանում՝ չմտածելով պահարանի և երգացանկի թարմացման մասին։