Սեբաստիան Ֆետելը կարող է զրկվել «Ֆորմուլա 1»-ի չեմպիոնի կոչումից

«Ռեդ Բուլ» թիմի գերմանացի ավտոարշավորդ Սեբաստիան Ֆետելը կարող է զրկվել Ֆորմուլա 1-ի 2012-ի աշխարհի չեմպիոնի տիտղոսից, քանի որ Բրազիլիայում անցկացվող Գրան պրիի ժամանակ խախտել է շրջանցի կանոնները. տեղեկացնում է AS-ը։

Երեքշաբթի օրը հրապարակվել են լուսանկարներ և տեսանյութ, որոնցում ցուցադրված է, թե ինչպես է Ֆետելը շրջանցում «Տորո Ռոսո» թիմի բոլիդին։ Տեսանյութում երևում է, որ գերմանացին շրջանց է կատարում դեղին լույսի վառվելուց հետո, սակայն դեղին լույսի առկայությունն արգելում է ավտոարշավորդներին շրջանցել այլ բոլիդներ:

Խախտման հաստատման դեպքում գերմանացուն կտուգանեն և նրա ժամանակին կավելացնեն ևս 20 վարկյան, ինչի հետևանքով նա կկորցնի միավորներ, և նրա միավորների քանակը կդառնա 277: Այս ցուցանիշն ավելի քիչ է, քան Ֆետելի հիմնական մրցակից, «Ֆերարիի» ավտոարշավորդ Ֆերնանդո Ալոնսոյինը. վերջինս էլ գերմանացու փոխարեն կհռչակվի չեմպիոն: 

«Ֆերարին» դեռ բողոք չի ներկայացրել, սակայն մինչև 2013-ի նոյեմբերի 30-ը ժամանակ ունի:

Նշենք, որ հետաքննություն կարող է սկսել նաև FIA-ն (Ավտոսպորտի միջազգային ֆեդերացիա):