Ինչո՞ւ Հունանյաններին չեն տեղեկացնում իրենց մոր մահվան մասին

1999 թվականի հոկտեմբերի 27-ի ոճրագործության պարագլուխներ Նաիրի և Կարեն Հունանյանները դեռևս տեղյակ չեն իրենց մոր՝ Նաթելլա Գալստյանի մահվան մասին։ Այս մասին Լուրեր.com-ի հետ զրույցում ասաց ՀՀ Արդարադատության նախարարության քրեակատարողական վարչության հասարակայնության հետ կապերի բաժնի պետ Գոռ Ղլեչյանը։ 

Ղլեչյանի խոսքերով՝ իրենք ոչ մի տեղից դեռ պաշտոնական փաստաթուղթ չեն ստացել։

Հարցին, թե հաշվի առնելով այն, որ կան բազմաթիվ հրապարակումներ Հունանյանի մոր մահվան վերաբերյալ, արդյոք Արդարադատության նախարարությունն ինքը քայլեր չի ձեռնարկի այդ լուրը ճշտելու համար, Գոռ Ղլեչյանն ասաց. «Օրենքով նախատեսված կարգով որևէ բարեկամ կամ հարազատ բերում է մահվան վկայականը, որի հիման վրա էլ մեր համապատասխան աշխատակիցը՝ հոգեբանը, կամ մեկ այլ աշխատակից, նրանց տեղեկացնում են այդ մասին»։

Նա նշեց նաև, որ Հայաստանում բնակվող հարազատներ Նաիրի և Կարեն Հունանյաններն ունեն։

Նշենք, որ ավելի վաղ Լուրեր.com-ի հետ զրույցում Գոռ Ղլեչյանն ասել էր, որ քրեակատարողական ծառայության մասին օրենքում և քրեական դատարավության օրենսգրքով արգելվում է ծանր կամ առանձնապես ծանր հանցագործություն կատարած անձանց, այդ թվում՝ ցմահ դատապարտյալներին, կարճատև տեսակցության գնալ հարազատի հուղարկավորությանը մասնակցելու համար, մնացած բոլոր դատարապարտյալներին թույլատրվում է։

Հիշեցնենք, որ նոյեմբերի 23-ի գիշերը, Ուկրաինայի Եվպատորիա քաղաքում՝ ծովի ափից երկու մետր հեռավորության վրա, հայտնաբերվել է 1999-ի հոկտեմբերի 27-ի ահաբեկչության գլխավոր կատարող Նաիրի Հունանյանի մոր դիակը։

Երեկ Комсомольская правда-Крым-ը հրապարակեց տեղեկատվություն, ըստ որի՝ Նաթելլա Գալստյանը մշտապես բնակվել է Եվպատորիայում կրտսեր որդու՝ Արմենի հետ:

Մայիսին Հունանյանի մայրը որդու՝ Արմենի հետ միասին ուղևորվել է Հայաստան՝ մյուս որդիներին տեսակցելու: Այդ ուղևորության ընթացքում Գալստյանը սկսել է օգտագործել հոգեմետ դեղեր, իսկ վերջերս էլ կնոջը սկսել են տանջել որդիների ձայները:

Նաթելլա Գալստյանի հարևանը պատմել է, որ այդ երեկո Նաթելլան այցելել է իրեն և հարցրել. «Երեխաներս քեզ մո՞տ են»։ «Նա ասում էր, որ իբր լսում է նրանց ձայները, որոնք գալիս են ծովից: Դրանից հետո, երբ նա հեռացավ մեր տանից, եկավ Արմենը. մորն էր փնտրում: Ավելի ուշ հաղորդեցին, որ ծովում նրա դին են հայտնաբերել»,-ասել է Վլադիմիրը:

Հարկ է նշել, որ ըստ Комсомольская правда-Крым-ի՝ Հունանյան եղբայրներն արդեն տեղյակ են ողբերգության մասին, բայց Արդարադատության նախարարությունը, հերքելով դա, դեռ սպասում է պաշտոնական փաստաթղթի։

 Ազա Արասխանյան