Որքան էլ լինեն խայթոցներ, մասնակցելու եմ ընտրություններին. Րաֆֆի Հովհաննիսյան

«Ժառանգություն» կուսակցության առաջնորդ, նախկին արտգործնախարար Րաֆֆի Հովհաննիսյանը Բաքու կատարած իր հանդիպումների ժամանակ հրապարակավ բարձրացրել է նաև ոճրագործ Ռամիլ Սաֆարովի հարցը։

«Ես հրապարակավ խոսեցի այդ հարցի շուրջ, բայց հրապարակային պատասխան չստացա»։

Րաֆֆի Հովհաննիսյանին մասնավոր զրույցներում ասել են, թե Սաֆարովի շուրջ քաղաքական ենթատեքստ չպետք է տեսնել, քանի որ վերջինս հոգեկան խանգարում ուներ։ «Փորձում էին չքմեղանալ, արդարացնել»,-ասաց Րաֆֆի Հովհաննիսյանը։

Խոսելով ներքաղաքական զարգացումների մասին՝ կուսակցության առաջնորդն ասաց. «Մենք միշտ բաց ենք եղել հաղորդակցության առջև, հանդիպել, լսել բոլոր կուսակցությունների տեսակետները։ Ես փորձել եմ ինտրիգային ստորգետնյա խորհրդակցություններից հեռու պահել «Ժառանգությանը»։ «Ժառանգության» և ԲՀԿ-ի միջև եղել է մի հանդիպում, ուրախ կլինեմ զորակցություն ստանալ ամենատարբեր կուսակցություններից և ՀԿ-ներից։

«Ով ուզում է հավաքական թեկնածություն կազմել, մենք պատրաստ ենք։ Եթե Հայաստանն ունենա դե յուրե նոր իշխանություն, ես պատրաստ եմ լինել այդ հավաքական թեկնածության մասնիկը։ Եթե երիտասարդությունը, քաղաքացիական հասարակությունը ոտքի կանգնի, ես կարող եմ լինել ինչպես այդ հավաքական թեկնածությունը, այնպես էլ պարզապես դրա մասնակիցը։

«Ես գնում եմ նախագահական ընտրությունների, ես մասնակցելու եմ, որքան էլ լինեն խայթոցներ, չար հայտարարություններ, ես մասնակցելու եմ նախագահական ընտրություններ»,-եզրափակեց վերջինս։