Դեռ որոշված չէ, թե աշխարհաքաղաքական կենտրոններից ում է հաջողվելու Հայաստանում նախագահ նշանակել

Լուրեր.com-ը զրուցեց քաղաքական և ընտրական տեխնոլոգիաների փորձագետ Արմեն Բադալյանի հետ, ով, գնահատելով երկրում տիրող ներքաղաքական իրավիճակը, նշեց, որ մեծ տարբերություն չկա այսօրվա իրավիճակի և մեկ-երկու ամիս առաջ եղած իրավիճակի միջև։

«Քաղաքական դաշտում կան երեք ազդեցիկ ուժեր՝ ՀԱԿ, ԲՀԿ, ՀՀԿ. ամենայն հավանականությամբ, այս երեք ուժերն ակտիվ գործունեություն են ծավալելու նախընտրական այս շրջանում։ Բնականաբար, նախագահ լինելու է այս երեք ուժերից մեկի ներկայացուցիչը, ով՝ չեմ կարող ասել։ Մնացած բոլոր թեկնածուները, որոնք այսօր կան, կլինեն, դրանք ընդամենը ֆոնային, դրածո թեկնածուներ են, որոնք իրենցից ոչինչ չեն ներկայացնում այն իմաստով, որ նրանք, այսպես ասած, «գունային երանգն» են ապահովոելու»,-ասաց նա։

Բադալյանի խոսքերով՝ այս երեք՝ ՀՀԿ, ՀԱԿ, ԲՀԿ թեկնածուներից դուրս որևէ այլ թեկնածուի մասին խոսելն անիմաստ է և ժամանակի կորուստ։

Անդրադառնալով այն հարցին, թե ինչպես կգնահատի երեք թեկնածուների հնարավորությունները, Բադալյանն ասաց.

«Շանսերը գնահատել չեմ կարող։ Շանսերը գնահատում են քաղաքակիրթ երկրներում, որտեղ կան սոցիոլոգիական հարցումներ, որոնք ցույց են տալիս նրանց հնարավորությունները։ Քանի որ հայ հասարակությունը բավականին թուլացել է, ակտիվացել է աշխարհաքաղաքական կենտրոնների միջամտությունը։ Ըստ իս՝ դա լինելու է ազդեցիկ ապագա նախագահական ընտրությունների ժամանակ։ Թեկնածուների հնարավորությունները գնահատել՝ առանց հաշվի առնելու աշխարհաքաղաքական կենտրոնների վերաբերմունքը, իմաստ չունի։ Կարող եմ ասել, որ այսօրվա դրությամբ, ըստ իս, վերջնականապես որոշված չէ աշխարհաքաղաքական կենտրոններից ում է հաջողվելու իր ազդեցությամբ այստեղ նախագահ նշանակել»,-ասաց Բադալյանը։