Ցեղասպանությունը վերապրածների վկայությունները կթարգմանվեն նաև թուրքերեն

Հայաստանի ազգային արխիվը հրատարակել է «Հայոց ցեղասպանությունը Օսմանյան Թուրքիայում. Վերապրածների վկայություններ» փաստաթղթերի եռահատոր ժողովածուն: Այսօր լրագրողների հետ հանդիպման ժամանակ այս մասին տեղեկացրեց ՀՀ ազգային արխիվի տնօրեն, գրքի հեղինակ և խմբագիր Ամատունի Վիրաբյանը՝ ներկայացնելով եռահատորյակը:

Եռահատոր աշխատությունը շուտով կթարգմանվի նաև ռուսերեն, անգլերեն ու թուրքերեն և կհամալրվի նոր երկու հատորներով: Այս մասին այսօր ասել է Հայաստանի ազգային արխիվի տնօրեն Ամատունի Վիրաբյանը՝ նշելով, որ եռահատորյակի թարգմանությունները կամփոփվեն մեկ հատորում:

Ամատունի Վիրաբյանը նշել է նաև, որ եռահատորի վաճառքից ստացված հասույթը նախատեսվում է նպատակաուղղել թարգմանությունների իրականացմանը, որոնք կտեղադրվեն նաև համացանցում: Աշխատության յուրաքանչյուր հատորը լույս է տեսել 1000 տպաքանակով։ Երեք հատորը միասին կարժենան 20 հազար դրամ:

Փաստաթղթերի եռահատոր ժողովածուի մեջ ներկայացված են Հայոց մեծ Եղեռնը վերապրածների 1916թ. տված վկայությունները, որոնցում անժխտելի փաստերի հիման վրա բացահայտված են թուրքական իշխանությունների կողմից 1915թ. հայ բնակչության ոչնչացմանն ուղղված ծրագրերը և իրականացրած գործողությունները, կազմակերպիչների և իրականացնողների անունները, հայ բնակչության գաղթը Անդրկովկաս և ճանապարհին տված զոհերը:

Առաջիկայում կտպագրվեն նաև աշխատության չորրորդ և հինգերորդ հատորները, որոնք կվերաբերեն Կիլիկիային և Օսմանյան Կայսրության հայաշատ մյուս տարածքներին: Գիրքն ունի տեղեկատու համակարգ, մանրակրկիտ ներկայացված է բնակավայրի տեղադրությունը:

Ընդ որում՝ առաջին հատորում ներկայացված է Վանի, երկրորդում՝ Բիթլիսի, երրորդում՝ Էրզրումի, Խարբերդի, Դիարբեքիրի, Սեբաստիայի, Տրապիզոնի նահանգները և Պարսկահայքը:

Ժողովածուի էջերում տեղ գտած վավերագրերն ունեն ապացուցողական նշանակություն և հսկայական հետազոտական նյութ են պարունակում: Ավելին՝ պատմաքաղաքական մեծ նշանակության հետ մեկտեղ, դրանք հետաքրքրություն կարող են ներկայացնել իրավական հետազոտություններ իրականացնողների համար, մանավանդ, որ վավերագրերի իրավաբանական նշանակությունը չի կորցրել իր արդիականությունն անգամ այսօր՝ Հայոց ցեղասպանության 100-րդ տարելիցի նախաշեմին: