Սերգո Կարապետյանն ընդունել է Թուրքմենստանի իր գործընկերոջը

ՀՀ գյուղատնտեսության նախարար Սերգո Կարապետյանն այսօր ընդունել է պաշտոնական այցով Երևան ժամանած Թուրքմենստանի նախագահ Գուրբանգուլի Բերդիմուհամեդովի գլխավորած պատվիրակության կազմում ընդգրկված Թուրքմենստանի գյուղատնտեսության նախարար Ռեջեփ Բազարովին և Թուրքմենստանի Վերամշակող արդյունաբերության ասոցացիայի նախագահ Վալի Վալիևին:

ՀՀ գյուղատնտեսության նախարարը ողջունել է հյուրերին և ընդգծել, որ ՀՀ գյուղատնտեսության նախարարությունը մեծապես շահագրգռված է գյուղատնտեսության ոլորտում բարեկամ Թուրքմենստանի հետ հարաբերությունների խորացմամբ: Նա նշել է, որ բնագավառը ունի համագործակցության մեծ ներուժ և կարևորել է համագործակցության ուղղությունների համակողմանի ուսումնասիրությունը: Նախարարը հանդիպման մասնակիցներին հակիրճ ներկայացրել է ՀՀ գյուղատնտեսության ներկա իրավիճակը և նշել է, որ ՀՀ կառավարությունը գյուղատնտեսությունը հռչակել է տնտեսության գերակա ճյուղ և ներկայացրել է ՀՀ կառավարության այն քայլերը, որոնք ուղղված են հանրապետությունում գյուղատնտեսության զարգացմանը:

Թուրքմենստանի գյուղատնտեսության նախարար Ռեջեփ Բազարովը շնորհակալություն է հայտնել հանդիպման համար, ներկայացրել է Թուրքմենստանում գյուղատնտեսության առկա վիճակը և նշել է, որ իրենք ևս պատրաստակամ են համագործակցություն ծավալել ՀՀ գյուղատնտեսության նախարարության հետ: Նախարարը մեկ անգամ ևս ընդգծել է երկու երկրների միջև համագործակցության ակտիվացման անհրաժեշտությունը: Զրուցակիցները երկուստեք կարևորել են վաղը ստորագրվելիք «ՀՀ կառավարության և Թուրքմենստանի կառավարության միջև անասնաբուժության բնագավառում համագործակցության մասին» և «ՀՀ գյուղատնտեսության նախարարության և Թուրքմենստանի գյուղատնտեսության նախարարության միջև համագործակցության մասին» համաձայնագրերը, որոնք ամուր իրավական հիմք կհանդիսանան երկկողմ համագործակցության և նոր ազդակ կհանդիսանան առկա համագործակցության խորացման և զարգացման համար: