Աշոտյանը թուրքմեն ուսանողներին առաջարկել է ուսումը շարունակել Հայաստանում

ՀՀ կրթության և գիտության նախարար Արմեն Աշոտյանն այսօր ընդունել է Թուրքմենիայի կրթության նախարար տիկին Գուլշատ Մամեդովայի գլխավորած պատվիրակությանը: Ողջունելով հյուրերին՝ Արմեն Աշոտյանը շնորհակալություն է հայտնել վերջերս Երևանում անցկացված ԱՊՀ անդամ-պետությունների կրթության ոլորտի աշխատողների և ուսուցիչների 2-րդ համագումարի աշխատանքներին Թուրքմենիայի պատվիրակության մասնակցության համար՝ նշելով, որ համագումարն անցել է արդյունավետ փոխհամագործակցության մթնոլորտում, և բոլոր կողմերը հնարավորություն են ունեցել ինչպես ներկայացնել, այնպես էլ ծանոթանալ այլ երկրներում առկա փորձին:

Ներկայացնելով ՀՀ կրթական համակարգը՝ նախարարն ընդգծել է, որ վերջին տարիներին ոլորտում լուրջ կառուցվածքային փոփոխություններ են իրականացվել, այդ թվում՝ անցում 12-ամյա հանրակրթության, որը, ըստ Արմեն Աշոտյանի, ժամանակատար գործընթաց է. «Միասնական կրթական տարածքին ինտեգրվելու համար Հայաստանի կրթական համակարգը երկար ճանապարհ է անցել, որը շարունակվում է նաև առ այսօր»,-նշել է նախարարը՝ այդ համատեքստում անդրադառնալով ուսուցիչների ատեստավորման և տարակարգի շնորհման, տնօրենների հավաստագրման, դպրոցական դասագրքերի, առանձնացված ավագ դպրոցների խնդիրներին: Անդրադառնալով բուհական համակարգում իրականացվող բարեփոխումներին՝ Արմեն Աշոտյանը նշել է, որ վերջին տարիներին պետությունը մեծ ուշադրություն է դարձնում կրթության որակին՝ ընդգծելով, որ այդ համատեքստում բավականին հեշտացվել են բուհական ընդունելության քննությունները և, հակառակը, դժվարացել է բուհում սովորելու գործընթացը: «Ամեն տարի հայաստանյան բուհեր է ընդունվում շուրջ 20 հազար ուսանող, որոնցից շուրջ 3 հազարը դուրս է մնում, այսինքն, իրականացվում է, այսպես ասած, բուհի ինքնամաքրման գործընթաց»,-նշել է Արմեն Աշոտյանը՝ բուհական համակարգում որպես առկա խնդիրներ մատնանշելով ֆինանսավորման և կոռուպցիայի խնդիրները:

Տիկին նախարարին, մասնավորապես, հետաքրքրել է Հայաստանի փորձը 12-ամյա կրթության, մասնավոր և պետական հատվածի համագործակցության, արհեստագործական ուսումնարանների գործունեության, ինչպես նաև Հայաստանի բուհերում օտարերկրյա ուսանողների ներգրավվածության փորձը:

Նախարար Արմեն Աշոտյանը, ներկայացնելով ՀՀ բուհերում օտարերկրյա ուսանողների ուսումնառության խնդիրները, առաջարկել է թուրքմենացի ուսանողներին իրենց ուսումը շարունակել հայաստանյան բուհերում՝ նշելով, որ այսօր ՀՀ-ում գործում են բարձր որակավորում ունեցող բուհեր և մասնագիտություններ:

Հանդիպման ընթացքում անդրադարձ է եղել նաև բուհերի միջազգային հավատարմագրման, միջբուհական համագործակցության և ուսանողների շարժունության խնդիրներին: