«Curiosity»-ն հնարավոր է գտել է օրգանական նյութեր

«Curiosity»-ն հավանաբար հայտնաբերել է պարզ օրգանական միացությունների մոլեկուլներ Մարս մոլորակի բնահողի մեջ, սակայն հետազոտության ճշգրիտ արդյունքները հայտարարվելու են դեկտեմբերի սկզբին Սան-Ֆրանցիսկոյում, նշել է NASA-ի «Ռեակտիվ շարժման լաբորատորիայի» (JPL) ղեկավար Չարլզ Էլաչին (Charles Elachi), փոխանցում է РИА «Новости»-ն:

Ավելի վաղ առաքելության գիտական ղեկավար Ջոն Գրոցինգերը (John Grotzinger) հայտնել էր, որ Մարսի բնահողի նմուշների հետազոտման ժամանակ հայտնաբերել է բավականին հետաքրքիր մի բան, սակայն գիտնականը հրաժարվել է ասել, թե ինչ է գտել «Curiosity»-ն` վկայակոչելով ամեն ինչը ևս մեկ անգամ ստուգելու և սխալները բացառելու անհրաժեշտության մասին:

«Հավանաբար «Curiosity»-ն գտել է Մարսի վրա պարզ օրգանական մոլեկուլներ: Դրանք դեռևս նախնական տվյալներ են, որոնք դեռ պետք է ճշտել»,-իտալական ԶԼՄ-ները մեջբերում են Էլաչիի հայտարարությունը, որ նա կատարել էր Հռոմի «La Sapienza» համալսարանում կայացած կոնֆերանսին:

NASA-ի «Ռեակտիվ շարժման լաբորատորիայի» (JPL) ղեկավարը ընդծել է, որ «Curiosity»-ն չունի այնպիսի սարք, որն ընդունակ է գտնել կենդանի օրգանիզմներ, սակայն այն կարող է գտնել օրգանական նյութերը:

Ինչպես նշում է իտալական Tgcom24 հեռուստաալիքը, եթե ենթադրությունները հաստատվեն, ապա դա շատ մեծ նշանակություն կունենա գիտության և Մարսի հետագա ուսումնասիրությունների համար, քանի որ օրգանական մոլեկուլները համարվում են կյանքի գոյության անհրաժեշտ պայման: