Աշխարհի առաջնության մեկնարկը տրվեց Երեւանում (լուսանկարներ)

Երևանի Կարեն Դեմիրճյանի անվան մարզահամերգային համալիրում տեղի ունեցավ բռնցքամարտի աշխարհի երիտասարդական առաջնության (ԱԻԲԱ) բացման հանդիսավոր արարողությունը։

Հայաստան են ժամանել 68 երկրի ներկայացուցիչներ, ավելի քան 620 մասնակիցներ: Դահլիճ մտան բոլոր 68 երկրների թիմերը: Հանդիսավոր շքերթը եզրափակեց Հայաստանի ազգային հավաքականը:

Առաջնության բացման արարողության ժամանակ ողջույնի խոսքով ելույթ ունեցան Հայաստանի օլիմպիական կոմիտեի նախագահ Գագիկ Ծառուկյանը և Հայաստանի բռնցքամարտի ֆեդերացիայի նախագահ Արման Մուրադյանը:

«Հարգելի հյուրեր բոլորին ի սրտե ողջունում եմ: Բոլորիս տրամադրությունը շատ բարձր է: Մենք կարողանում ենք ամեն տարի կազմակերպել նման մեծ հանդիսություն: Այս բոլորը կազմակերպել ենք մեր երիտասարդության համար, որ տեսնեն որ չեմպիոն դառնալը դժվար չէ: Այս ութ օրերի ընթացքում բոլորի մուտքը ազատ և անվճար է լինելու, որպեսզի բոլորը գան տեսնեն և մասսայական դառնա այս մազրաձևը: Հաղթելու է ուժեղագույնը: Ես բոլորին հաջողություն եմ մաղթում: Սա մեր հյուրերին մեծ հնարավորություն է ծանոթանալ Հայաստանի հետ, մեր մշակույթի հետ»,- ասաց ՀԱՕԿ նախագահ Գագիկ Ծառուկյանը:

«Սիրելի մարզիկներ, մարզասերներ, բարի գալուստ Հայաստան: Այս պահին բոլորի հայացքները սևեռվել են Երևանի վրա: Այստեղ իրենց սպորտային կարողություններ են ցույց տալու աշխարհի լավագույն մարզիկները: 2009 թվականին առաջին անգամ Հայաստանում անցկացրած աշխարհի առաջնությունը հրաշալի կազմակերպելը հիմք հանդիսացավ, որ ԱԻԲԱ-ն երկրորդ անգամ վստահի այս մարզական ստուգատեսը Հայաստանին: Հայաստանի բռնցքամարտի ֆեդերացիան պատրաստ է հավուր պատշաճի անցկացնել այս ստուգատեսը»,- նշեց ՀԲՖ նախագահ Արման Մուրադյանը:

ՀԱՕԿ Նախագահի և ՀԲՖ նախագաների ելույթներից հետո հնչեց Հայաստանի հիմնը՝ ՀՀ պաշտպանության նախարարության նվագախմբի և օպերային երգիչ Սարիբեկ Սարգսյանի կատարմամբ:

Հայաստանի պետական հիմնի կատարումից հետո ԱԻԲԱ-ի կանոնակարգի համաձայն առաջնության մասնակից երկրները երդման արարողություն կատարեցին: Մարզիկների երդման արարողությունը վստահվեց Հայաստանի ազգային հավաքականի անդամ Ռաֆայել Սիմոնյանին: Իսկ մարզիչների երդման արարողությունը հանձն առավ Անգլիայի ներկայացուցիչ Նիկ Բեսիլը:

Մենամարտերը կմեկնարկեն նոյեմբերի 29-ին։ Հայաստանը կներկայացնեն Հայրիկ Նազարյանը (49 կգ , Գավառ), Հենրիկ Մոքոյանը (52 կգ , Երևան), Տարոն Սողոմոնյանը (56 կգ , Զովունի), Արման Դարչինյանը (60 կգ , Վանաձոր), Գոռ Երիցյանը (64 կգ, Երևան), Յուրա Միքայելյանը (69 կգ, Գյումրի), Արտավազդ Հարոյանը (75 կգ, Գյումրի), Նիկոլ Հարությունովը (81 կգ , Աբովյան), Ռաֆայել Սիմոնյանը (91 կգ, Վանաձոր), Նարեկ Մելքոնյանը (+ 91 կգ , Էջմիածին):

sport.news.am