Երևանի քաղաքապետարանը սկսել է Սարալանջի ճանապարհի իրենցից վտանգ ներկայացնող ժայռաբեկորների հեռացումը (ՖՈՏՈ, ՏԵՍԱՆՅՈՒԹ)

Այսօր՝ հունվարի 8-ին, Երևանի նորակառույց Սարալանջի ճանապարհին, սկսել են քարաթափման աշխատանքներ։

Ինչպես քարաթափման վայրից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, քարաթափման աշխատանքները ղեկավարում է Երևանի քաղաքապետի տեղակալ Կամո Արեյանը։ Այս պահին քաղաքապետի տեղակալը գտնվում է քարաթափման վայրում, որտեղ «Հունդայի» մակնիշի երկարաթև «էսկավատոր» հատուկ տեխնիկայով հսկայական ժայռաբեկորները քանդում են, որից հետո բեռնատարներով տեղափոխում։ Քանդման և տեղափոխման աշխատանքները կատարվում են «Սահակյանշին» ընկերության կողմից։

Այս հատվածում անցած տարվա վերջերին և այս տարի տեղի էր ունեցել 4 նմանատիպ փլուզում, և, բարեբախտաբար, զոհեր և վիրավորներ չկային։

Ֆոտոլրագրողի հետ զրույցում Երևանի քաղաքապետի տեղակալ Կամո Արեյանը հայտնեց, որ քարաթափման աշխատանքները մոտավորապես կատարվելու են 200-300 մետր երկարությամբ, քանի որ իրենից լուրջ վտանգ ներկայացնող հատված է սա։

Ծառայություն են կատարում նաև Երևանի Ճանապարհային ոստիկանության աշխատակիցները, որոնց աշխատանքները ղեկավարում է Երևանի ՃՈ պետ Եղիշ Ենգիբարյանը։ Առավոտից աշխատանքներ են կատարվում և արդեն 8 մեքենա հսկայական ժայռաբեկորներ է տեղափոխել։ Ըստ նախնական տեղեկությունների՝ կտեղափոխվի մոտ 4000 տոննա ժայռաբեկոր։

Լուսանկարները և տեսանյութերը՝ Գագիկ Շամշյանի

{gallery}shamshyan/Qar-Saralanj{/gallery}