Սկսվեց Մարգար Օհանյանի գործով դատավարությունը (ՖՈՏՈ, ՏԵՍԱՆՅՈՒԹ)

Այսօր՝ հունվարի 9-ին, Երևանի Կենտրոն, Նորք-Մարաշ վարչական շրջանների ընդհանուր իրավասության դատարանում սկսվեց Ճանապարհային ոստիկանության նախկին պետ, ոստիկանության գնդապետ Մարգար Օհանյանի դատավարությունը։

Ինչպես դատարանից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, դատական նիստը վարում է նշված դատարանի դատավոր Մխիթար Պապոյանը։ Դատարան են ներկայացել Մարգար Օհանյանը, Ճանապարհային ոստիկանության 2-րդ սպայական գումարտակի նախկին հրամանատար Ստեփան Կարախանյանը, ինչպես նաև Ճանապարհային ոստիկանության աշխատակիցներ Արա Լևոնյանը և Սամվել Մախմուրյանը։

Մեղադրանքը նշված դատական նիստում պաշտպանում է Գլխավոր դատախազության դատախազ Հարություն Հարությունյանը։ Դատարանի ողջ վարչական շենքը վերցված է ուժեղացված հսկողության տակ, որը ղեկավարում է նշված դատարանի կարգադրիչների ստորաբաժանման պետ Արթուր Փիլոսյանը։ Դատարան մուտք գործող բոլոր քաղաքացիներին պարտադիր ստուգում են։

Այս պահին դատական նիստի քարտուղարը դատարանին ներկայացրեց բոլորին և նրանց փաստաբաններին։ Դատական նիստի դահլիճում, որը տեղի է ունենում նշված դատարանի 2-րդ հարկի թիվ 2-րդ դահլիճում կարելի է ասել «ասեղ գցելու տեղ չկա»։ Դատարանում Մարգար Օհանյանի կողքին նստած է Ստեփան Կարախանյանը, ում ցուցմունքների հիման վրա է, որ մեղադրանք է առաջադրվել Մարգար Օհանյանին։ Այս պահին դատական նիստը շարունակվում է։

Դատարան ներկայանալու ժամանակ Ստեփան Կարախանյանը, տեսնելով լրագրողներին, արտահայտվեց. «Նկարե՛ք, նկարե՛ք, էնքան նկարեք մինչև կշտանաք՝ մեռնե՛ք», ինչին լրագրողները պատասխանեցին՝ «ավելի լավ է նկարելով մեռնենք, քան՝ բենզին գողանալով»։

Դատական նիստը հետաձգվեց. այն կկայանա հունվարի 13–ին ժամը 11:30–ին։

Լուսանկարները և տեսանյութը` Գագիկ Շամշյանի

{gallery}shamshyan/margar-ohanyan{/gallery}