Նկարիչների միության քանդակագործների կոմբինատի մոտ իրենց բողոքի ակցիան են կատարում մի խումբ աշխատակիցներ (ՖՈՏՈ, ՏԵՍԱՆՅՈՒԹ)

Այսօր՝ հունվարի 11-ին, Երևանի Նոր Նորք վարչական շրջանում գտնվող նկարիչների միությանը պատկանող քանդակագործական կոմբինատի մոտ են հավաքվել 50-60 հոգի։

Ինչպես նշված վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, նշված կոմբինատի տարածքում 7-10 տարուց ավել աշխատում են մի քանի սահմանափակ պատասխանատվությամբ ընկերություններ և անհատ ձեռներեցներ։ Ընդհանուր առմամբ նշված գործարանում աշխատում են 60-ից ավել քաղաքացիներ, որտեղ պատրաստում են երկաթե դռներ, պատուհաններ, ջահեր, գմբեթներ և այլ ապրանքներ։

Այսօր առավոտյան, երբ աշխատակիցները եկել են սովորականի նման աշխատանքի վայր և հավաքվել մուտքի մոտ, նրանց մուտքը տարածք՝ իրենց օրինական աշխատանքի վայր, արգելել են՝ պատճառաբանելով, որ տնօրենը՝ Մարտին Հարությունյանը, ով 1 ամիս առաջ է նշանակվել, արգելում է։

Այս պահին դարպասների մուտքի մոտ են հավաքվել աշխատակիցներն իրենց ավտոմեքենաներով և հրաժարվում են ազատել դարպասի դիմացի տարածքը, քանի որ նրանք զրույցում նշում են, որ տնօրենի կատարած քայլերն անօրինական են։ Հավաքվածները նաև պատմում են, որ երեկ տնօրենն անցկացրել է ժողով և ժողովի ընթացքում վիրավորական արտահայտություններ է արել աշխատակիցների նկատմամբ։ Մուտքի մոտ հավաքվածները պատմում են նաև, որ տնօրենի գիտությամբ հատվել են ծառեր։

Հավաքվածները նաև հայտնում են, որ իրենք նորանշանակ տնօրենի հետ ունեն կնքված պայմանագրեր 3 ամսով, սակայն մի ամիսն էլ չի լրացել դեռ, և, չգիտես ինչու, տնօրենը դիմում է անօրինական քայլերի։ Պատմում էին նաև, որ պայմանագրերը կնքելուց հետո, իրենք պատվերներ են ընդունել տարբեր ապրանքների արտադրության, սակայն այս պահին չեն կարող աշխատել և կստացվի, որ իրենք իրենց պատվիրատուներին խաբում են։

Ֆոտոլրագրողը հայտնեց նաև, որ խոսել է տնօրեն Մարտին Հարությունյանի հետ, ով հայտնում է, որ ինքը ոչ մի պայմանագիր չունի կնքած, բայց քանի որ կոմբինատի ներսում հակասանիտարական վիճակ է, չեն գործում սանհանգույցները, կոյուղին, դրա համար էլ ինքը ժամանակավորապես դադարեցրել է կոմբինատում աշխատանքներ կատարելը։ Տնօրենը հայտնեց նաև, որ այդ ամենը լուծելուց հետո «ես ինքս եմ շահագրգռված, որ աշխատատեղերը չփակվեն, այլ մի բան էլ ավելանան»։ Սակայն հավաքվածները չեն հավատում տնօրենի խոսքերին։

Իսկ ծառերի կտրման փաստով տնօրենը ֆոտոլրագրողին հայտնել է, որ իրենք ոչ մի ծառ էլ չեն հատել, այլ կատարվել են սանիտարական էտումներ և առաջիկայում կոմբինատի տարածքում մեծ թվով ծառեր են տնկվելու։

Լուսանկարները և տեսանյութը՝ Գագիկ Շամշյանի

{gallery}shamshyan/Gorcaran{/gallery}