Ավտոմեքենան մոտ 300 մետր գլորվել է ձորը. վարորդի դին փրկարարները դուրս են բերել ձորից (ՖՈՏՈ, ՏԵՍԱՆՅՈՒԹ)

Այսօր՝ հունվարի 17-ին, Կոտայքի մարզում արտակարգ պատահար է տեղի ունեցել։

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 12.00-ի սահմաններում ոստիկանության Կոտայքի բաժին անհայտ քաղաքացին ահազանգել է, որ Երևան–Սևան ավտոճանապարհի «Չայնիի» ոլորաններում ավտոմեքենա է գլորվել։

Այս պահին դեպքի վայր են ժամանել ոստիկանության Կոտայքի մարզային վարչության և Աբովյանի բաժնի աշխատակիցները՝ Աբովյանի ոստիկանապետ Խաչիկ Ավետիսյանի գլխավորությամբ։ Ժամանել են նաև ՀՀ արտակարգ իրավիճակների նախարարության Հայաստանի փրկարար ծառայության Կոտայքի մարզի հատուկ փրկարարական ջոկատը՝ վարչության պետ Գեղամ Գրիգորյանի գլխավորությամբ։ Նշված ձորում հայտնաբերվել է «ՎԱԶ 2106» մակնիշի 03 ՏՏ 938 համարանիշի ավտոմեքենա՝ ամբողջովին վնասված։

Փրկարարները հատուկ տեխնիկայի միջոցով մեքենայից դուրս են բերել վարորդի դին։ Ֆոտոլրագրողը հայտնում է, որ մահացածը 34-ամյա Երևանի Ախբարաշեն թաղամասի բնակիչ Տիգրան Ջուլյանն էր, ում ոստիկանությունը որպես անհայտ կորած մի քանի օր է փնտրում է։

Դեպքի վայր են ժամանել նաև դատական բժիշկը, փորձագետը և ոստիկանության քննչական գլխավոր վարչության Կոտայքի մարզի քննչական բաժնի քննիչը։ Քննիչի որոշմամբ արդեն նշանակվել են մի շարք փորձաքննություններ։ Ավտոմեքենան ճանապարհից գլորվել էր ձորը մոտ 300 մետր։ Այս պահին փրկարարները քարշակի և վերամբարձ կռունկի օգնությամբ փորձում են ավտոմեքենան դուրս բերել ձորից, որը տեղափոխվելու է ոստիկանության Աբովյանի բաժնի տուգանային հրապարակ։ Այստեղ են հավաքվել մեծ թվով հետաքրքրասեր քաղաքացիներ, որոնց փորձում են դեպքի վայրից հեռացնել ճանապարհային ոստիկանության 2-րդ սպայական գումարտակի 5-րդ վաշտի աշխատակիցները՝ հրամանատար Արսեն Գրիգորյանի գլխավորությամբ։

Փաստի առթիվ ոստիկանության Կոտայքի քննչական բաժնում նյութեր են նախապատրաստվում։

Լուսանկարները և տեսանյութը` Գագիկ Շամշյանի

{gallery}shamshyan/Chayni{/gallery}