Փոխհրաձգության կասկածանքով ոստիկանություն են տարվել մի քանի արտասահմանյան մակնիշի ավտոմեքենաներ. ժամանել է ԱԺ պատգամավոր (Ֆոտո, Տեսանյութ)

Այսօր՝ հունվարի 17-ին, ոստիկանության քննչական գլխավոր վարչության Արաբկիրի քննչական բաժնում հարուցվել է քրեական գործ այսօր՝ կեսօրին, Արաբկիր վարչական շրջանում տեղի ունեցած կրակոցների փաստով։

Ինչպես ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, քիչ առաջ ոստիկանության Արաբկիրի բաժնի օպերատիվ–քննչական խումբը Տիգրանյան փողոցի վրա գտնվող «Նիկո» խանութների ցանցի դիմացից ոստիկանության Արաբկիրի բաժին է տեղափոխել նշված վայրից երկու ավտոմեքենա՝ «ՎԱԶ 2121» մակնիշի 71 TO 001 համարանիշի և «Մերսեդես E-250» մակնիշի 002 ՕՕ 07 համարանիշի ավտոմեքենաները։

Ֆոտոլրագրողը հայտնում է նաև, որ իրեն հայտնի է դարձել, որ տեղի ունեցած միջադեպի փաստով ոստիկանության Արաբկիրի բաժին են տեղափոխվել նաև տասից ավելի քաղաքացիներ՝ հիմնականում երիտասարդներ։ Ոստիկանության Արաբկիրի բաժնի մոտ հավաքված քաղաքացիները, ովքեր ասում էին, որ իրենց ընկերներն են բերվել ոստիկանություն, իրենց զրույցում պատմում էին, որ միջադեպը տեղի է ունեցել «Նիկո» կահույքի խանութների ցանցի տիրոջ հարազատների և «Դավիդով» ընկերության տերերի հարազատների միջև։ Թե արդյո՞ք այս տեղեկությունը համապատասխանում է իրականությանը, ոստիկանության Արաբկիրի բաժնում հրաժարվեցին ասել՝ պատճառաբանելով, որ այս պահին նյութեր են նախապատրաստվում։

Ֆոտոլրագրողը հայտնում է, որ քիչ առաջ ոստիկանության Արաբկիրի բաժին ժամանեց ազգային ժողովի պատգամավոր, «Մխիկ» մականվամբ Արմեն Մխիթարյանը, ով նեղսրտեց, երբ ֆոտոլրագրողը լուսանկարում էր նրա մուտքը Արաբկիրի ոստիկանության շենք։ Ոստիկանության Արաբկիրի բաժնի դարպասների մոտ կայանված էր նաև «Պորշ Կայեն» մակնիշի 77 ԼԼ 100 համարանիշի ավտոմեքենան, և երբ ֆոտոլրագրողը լուսանկարել է այդ ավտոմեքենան, վարորդը դիմել է փախուստի։ Ֆոտոլրագրողը հայտնում է, որ իրեն հայտնի է դարձել, որ այդ ավտոմեքենան պատկանում է «Լիդեր» մականվամբ Հովհաննես Վարդանյանին, ով աշխատում է ՀՀ գլխավոր դատախազությունում, իսկ կռվի մասնակիցների մեջ է նաև նրա որդին։

Ինչպես ավելի վաղ ԼՈՒՐԵՐ.com–ին դեպքի վայրից հայտնել էր ֆոտոլրագրող Գագիկ Շամշյանը, այսօր Տիգրանյան փողոցում՝ «Նիկո» խանութի մոտ, տեղի էր ունեցել վիճաբանություն, որի ժամանակ հնչել էին կրակոցներ։

Դեպքի վայր էին ժամանել ոստիկանության Երևան քաղաքի վարչության պետ, ոստիկանության գեներալ–մայոր Ներսես Նազարյանը, ոստիկանության քրեական հետախուզության գլխավոր վարչության 2-րդ վարչության պետ Ալիկ Մարգարյանը, Արաբկիրի ոստիկանապետ Արթուր Մեհրաբյանը, Քանաքեռ–Զեյթունի ոստիկանապետ Կարեն Հովհաննիսյանը, քննիչներ և փորձագետներ։

Դեպքի վայրում հայտնաբերվել էր 13 կրակված պարկուճ՝ 3 տեսակի հրազենից արձակված։ Կրակոցների արդյունքում վնասվել էին «Նիկո» խանութի ապակիները։

Լուսանկարները և տեսանյութը՝ Գագիկ Շամշյանի

{gallery}shamshyan/Niko-1{/gallery}