Պայթյուն Մարտունիում. ընտանիքի բոլոր անդամները տեղափոխվել են հիվանդանոց (ՖՈՏՈ, ՏԵՍԱՆՅՈՒԹ)

Այսօր՝ հունվարի 20-ին՝ ժամը 06.30-ի սահմաններում, ոստիկանության Մարտունու բաժնի աշխատակիցները ահազանգ են ստացել, որ Մարտունու քաղաքի Աբովյան 4 հասցեում պայթյուն է տեղի ունեցել։

Ինչպես դեպքի վայրից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, շտապ նշված հասցե են մեկնել ոստիկանության Մարտունու բաժնի օպերատիվ խումբը՝ Մարտունու ոստիկանապետ Վահան Մարգարյանի գլխավորությամբ։ Արդեն պայթյունի վայրից ոստիկանները ահազանգել են ՀՀ արտակարգ իրավիճակների նախարարության Հայաստանի փրկարար ծառայության Գեղարքունիքի մարզի Մարտունու քաղաքի հրշեջ–փրկարարներին, գազի ծառայության ներկայացուցիչներին և Մարտունու բժշկական կենտրոնի բուժանձնակազմին։

Դեպքի վայրում հավաքվածները ֆոտոլրագրողին պատմել են, որ պայթյունի պատճառը գազի արտահոսքի հետևանքով է եղել։ Ամբողջովին փլվել է տունը, որի հետևանքով Մարտունու բժշկական կենտրոն են տարբեր աստիճանի այրվածքներով և մարմնական վնասվածքներով տեղափոխվել ընտանիքի 4 անդամները՝ 48-ամյա Վանիկ Խաչատրյանը, 45-ամյա Սոնա Խաչատրյանը, 22-ամյա Նուշիկ խաչատրյանը և 17-ամյա Նարեկ Խաչատրյանը։

Այս պահին ժամանել են արդեն ոստիկանության քննչական գլխավոր վարչության Գեղարքունիքի մարզի քննչական բաժնի Մարտունու քննչական բաժանմունքի քննիչները ու փորձագետները։

Փաստի առթիվ ոստիկանության Մարտունու քննչական բաժանմունքում նյութեր են նախապատրաստվում։ Ֆոտոլրագրողը հայտնում է նաև, որ դեռ 2010 դեկտեմբերին նույն Մարտունու քաղաքում գազի արտահոսքից տեղի էր ունեցել հզոր պայթյուն, որի ժամանակ փլուզվել էր խանութը։ Այդ խանութը պատկանում էր Վանիկ Խաչատրյանի ազգականներին, և պայթյունն այն անգամ նույնպես տեղի էր ունեցել գազի արտահոսքի հետևանքով։

Լուսանկարները և տեսանյութը՝ Գագիկ Շամշյանի

{gallery}shamshyan/Martuni-paytyun{/gallery}