Սևանի ոստիկանները հենց դեպքի վայրում հայտնաբերել են ապօրինի հատված ծառերով բարձված ավտոմեքենան (ՖՈՏՈ)

Ինչպես ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, ոստիկանության Սևանի բաժնի աշխատակիցները, իրացնելով օպերատիվ տեղեկությունները, երեկ՝ հունվարի 20-ին՝ կեսգիշերին, ոստիկանության Սևանի բաժին են բերման ենթարկել Գեղարքունիքի մարզի Ծովագյուղի բնակիչներ, 22-ամյա երկվորյակ եղբայրներ Թովմաս և Գրիշա Թովմասյաններին, 22-ամյա Արտակ Խաչատրյանին, 22-ամյա Վահագն Թովմասյանին։

Սևանի ոստիկանները պարզել են, որ նշված անձիք, այս տարվա հունվարի 18-ին «Սևան ազգային պարկ» Պետական ոչ առևտրային կազմակերպության «Ախթամար» տեղամասի անտառահատվածում անօրինական, ապօրինի եղանակով հատել են թվով 10 հատ սոճենի տեսակի ծառեր։ Ապօրինի հատված ծառերի մի մասը նրանք բարձել և ցանկացել են տեղափոխել Սևանի բնակիչ Մերուժան Աֆրիկյանին պատկանող «ՈՒԱԶ» մակնիշի 34 ՏՏ 401 համարանիշի ավտոմեքենայով։

Անտառանյութը բեռնելու ժամանակ ոստիկանները հենց դեպքի վայրում հայտնաբերել են նաև հանցագործության գործիք հանդիսացող սղոցն ու կացինը։

Փաստի առթիվ ոստիկանության Սևանի բաժնում նյութեր են նախապատրաստվում։ Պատճառված վնասի չափը ճշտելու համար նշանակվել է փորձաքննություն։ «Սևան ազգային պարկում» ֆոտոլրագրողին պատմել են, որ ապօրինի հատված ծառերը եղել են 15-20 տարեկան։ Նշված անձիք ստորագրությամբ ազատ են արձակվել։

Ֆոտոլրագրողը հայտնում է, որ բերման ենթարկված 4 երիտասարդներն էլ սոցիալապես անապահով, բազմանդամ ընտանիքներից են և փորձել են փայտը տանել ոչ թե վաճառելու, այլ տունը տաքացնելու նպատակով։

Ոստիկանության Սևանի բաժնի մոտ ֆոտոլրագրողին մի տղամարդ փորձում էր համոզել, որպեսզի տեղի ունեցած դեպքը չհրապարակի, համոզելով թե՝ «ճժերուն մի նկարի, քելե երթանք, ճժերուն մի նկարի»։ Գ. Շամշյանը հայտնում է, որ պարզել է, որ այդ մարդը Ծովագյուղի գյուղապետ Գևորգ Թովմասյանն է, իսկ ծառահատողներն իր ազգականներն են։

Լուսանկարները` Գագիկ Շամշյանի

{gallery}shamshyan/Sevan-car{/gallery}