Դատարանը մերժեց Անժելա Սարգսյանի գործով ամբաստանյալի միջնորդությունը (ՖՈՏՈ)

Այսօր՝ հունվարի 24-ին, Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում սկսվել էր դերասանուհի Անժելա Սարգսյանի անձնական կյանքին վերաբերող տեղեկությունները, այդ թվում՝ լուսանկարների և տեսանյութերի տեսքով համացանցում տարածած Կարեն Արայանի դատավարությունը։

Ինչպես ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, քիչ առաջ առաջին դատական նիստն ավարտվեց։ Առաջին դատական նիստը տեղի էր ունենում նշված դատարանի 2-րդ հարկի 3-րդ դահլիճում, իսկ նիստը ընթանում էր դռնփակ կարգով։ Այն որոշել էր դռնփակ անցկացնել դատավոր Մխիթար Պապոյանը, քանի որ վերաբերում էր մարդու անձնական կյանքին։

Այսօր՝ դատական նիստին, Անժելա Սարգսյանը չէր ներկայացել և դռնփակ դատական նիստը տեղի է ունեցել առանց նրա։ Ֆոտոլրագրողը հայտնում է նաև, որ անգամ նիստին ներկա չի եղել Ա. Սարգսյանի ներկայացուցիչը, եթե իհարկե Անժելա Սարգսյանն ունի ներկայացուցիչ նշված դատական նիստին մասնակցելու համար։ Դատարան էին ներկայացել գործով անցնող մի քանի վկաներ, այդ թվում՝ դերասաններ, սակայն այսօրվա դատական նիստում ոչ մի վկայի չլսեց դատարանը։

Դատական նիստի ժամանակ Կ. Արայանի պաշտպան Արթուր Ղարիբյանը միջնորդություն էր ներկայացրել դատարանին, որպեսզի իր պաշտպանյալը գրավով ազատ արձակվի։ Փաստաբանի միջնորդությանը դեմ հանդես եկավ ՀՀ գլխավոր դատախազության ներկայացուցիչ Վահե Հովհաննիսյանը։ Դատավորը խորհրդակցական սենյակից վերադառնալուց հետո որոշեց միջնորդությունը մերժել՝ պատճառաբանելով, որ դեռ դատաքննության ընթացքում պետք է լսվեն կարևոր վկաներ, իսկ դրսում լինելով ամբաստանյալը կարող է ճնշում գործադրել նրանց նկատմամբ։

Այսօրվա դատական նիստին ցուցմունք է տվել ամբաստանյալը։ Դատական նիստը հետաձգվեց և նշանակվեց փետրվարի 13-ին՝ ժամը 11.30-ին։ Դատարանի շենքում էր նաև Կարեն Արայանի մայրը՝ Մարինան, ով հրաժարվեց խոսել լրագրողների հետ՝ հայտնելով, որ իր բոլոր հարցերի պատասխանները կարող է տալ միայն Անժելա Սարգսյանը։ Նա հայտնեց, որ «ցանկություն ու տրամադրություն չունեմ խոսելու»։

Ի դեպ, ամբաստանյալ Կ. Արայանը հանցագործ աշխարհում հայտնի, նախկին «օրենքով գող» Շուրիկի որդին է։

Լուսանկարները՝ Գագիկ Շամշյանի

{gallery}shamshyan/Anjela-dat{/gallery}