Սևանի քաղաքապետի ազգականը խուսափել է պետբյուջե վճարել ավելի քան 29 մլն ՀՀ դրամ

ՀՀ գլխավոր դատախազությունում հարուցվել է քրեական գործ պետական բյուջե խոշոր չափի գումար չվճարելու փաստով։

Ինչպես ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, հունվարի 9-ին ՀՀ գլխավոր դատախազության կոռուպցիոն և կազմակերպված հանցագործությունների գործերով վարչությունում հարուցվել է քրեական գործ ՀՀ Քրօր–ի 205 հոդվածի 2-րդ մասի հատկանիշներով։

Ֆոտոլրագրողը հայտնում է, որ նշված քրեական գործը հարուցվել է Գեղարքունիքի մարզի Սևան քաղաքի 37 շենքի բնակիչ «Վարս և Վարդ» ՍՊԸ տնօրեն 59-ամյա Գագիկ Մալխասյանի նկատմամբ։ Գ. Մալխասյանը Սևանի տարածքային հարկային տեսչություն 2008-2009 թթ. հաշվետվություններում խեղաթյուրված տվյալներ է ներկայացրել, ինչի հետևանքով խուսափել է պետական բյուջե որպես հարկ վճարել 29 մլն 207 հազար 900 ՀՀ դրամ։

Փաստի առթիվ քննությունը վարում է ՀՀ գլխավոր դատախազությունը։ Սևանում ֆոտոլրագրողին պատմել են, որ Գ. Մալխասյանը Սևանի քաղաքապետ Գևորգ Մալխասյանի ազգականն է։ Սևանցիները նաև պատմում էին, որ գուցե այս անգամ համապատասխան մարմինները կպատժեն մեղավորին։