«Գազել»-ը Մաստարայի ճանապարհին կողաշրջվել է. կան վիրավորներ

Այսօր՝ հունվարի 25-ին, ավտովթար է տեղի ունեցել Արագածոտնի մարզում։

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 19.30-ի սահմաններում Երևան-Գյումրի ավտոճանապարհի 82-րդ կմ-ի հատվածում՝ Մաստարա գյուղի ճանապարհին, «Գազել» մակնիշի 45 ՍՍ 008 համարանիշի ավտոմեքենայի վարորդ, Շիրակի մարզի բնակիչ 59-ամյա Գալուստ Գալոյանը դուրս է եկել ճանապարհի երթևեկելի մասից և կողաշրջվել։

Վթարի հետևանքով ավտոմեքենայի ուղևորներ 59-ամյա Մանյակ Եփրեմյանը և Քրիստինե Գալոյանը մարմնական վնասվածքներով տեղափոխվել են Թալինի բժշկական կենտրոն։ Ֆոտոլրագրողը հայտնում է, որ Մ. Եփրեմյանը վարորդի կինն է, իսկ Ք. Գալոյանը՝ նրանց աղջիկը։ Վթարի վայր են ժամանել ճանապարհային ոստիկանության 2-րդ սպայական գումարտակի 1-ին դասակի աշխատակիցները։

Ժամանել է նաև ոստիկանության քննչական գլխավոր վարչության Արագածոտնի մարզի քննչական բաժնի Թալինի քննչական բաժանմունքի քննիչը։ Փաստի առթիվ ոստիկանության Թալինի քննչական բաժանմունքում նյութեր են նախապատրաստվում։