Ավտովթար Չարենցի փողոցում. «Մեծ անիվ»-ի ներկայացուցիչը տեղափոխվել է հիվանդանոց (ՖՈՏՈ)

Այսօր՝ հունվարի 25-ին, ավտովթար է տեղի ունեցել Երևանում։

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 16.30-ի սահմաններում Չարենց փողոցի թիվ 7՝ «Կերամիկա» խանութի շենքի դիմաց, 40-ամյա Առաքել Չարչյանը, վարելով «ՎԱԶ 21703» մակնիշի 915 ԼՕ 67 համարանիշի ավտոմեքենան, ընդհարվել է Երևանի պետական ճարտարագիտական համալսարանի մագիստրատուրայի 1-ին կուրսի ուսանող 25-ամյա Սմբատ Ստեփանյանի վարած «Օպել» մակնիշի 29 ՏՕ 160 համարանիշի ավտոմեքենային։

Բախման հետևանքով «Օպել» մակնիշի ավտոմեքենան էլ իր հերթին ընդհարվել է մայթեզրի մոտ կայանված «ԻՄԷՔՍ ԳՐՈՒՊ» ՍՊԸ–ի աշխատակից 30-ամյա Գագիկ Դավթյանին պատկանող «ՎԱԶ 21093» մակնիշի 13 ՕԼ 109 համարանիշի ավտոմեքենային։ Ավտովթարի հետևանքով «ՎԱԶ 21703» մակնիշի ավտոմեքենայի ուղևոր 23-ամյա Դրաստամատ Ասլանյանը, ով, ըստ ֆոտոլրագրողի, աշխատում է ՀՀ ոստիկանության անձի անվտանգության և գույքի պահպանության բաժնի ռազմականացված ջոկատում, մարմնական վնասվածքներով տեղափոխվել է թիվ 1 համալսարանական հիվանդանոց։

Դեպքի վայրում հավաքվածները պատմել են, որ Դ. Ասլանյանը ծառայություն է կատարում «Մեծ անիվ» ընկերությունում, իսկ Ա. Չարչյանն աշխատում է ՀՀ ոստիկանության պետական պահպանության գլխավոր վարչությունում՝ որպես ջոկի հրամանատար։

Դեպքի վայրում քննչական աշխատանքները ղեկավարում է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Դավիթ Մարտիրոսյանը։ Քննիչի հանձնարարականով մեքենաները տեղափոխվեցին Երևանի ՃՈ տուգանային հրապարակ։

Լուսանկարները՝ Գագիկ Շամշյանի

{gallery}shamshyan/25-01-3avto{/gallery}