Խոշոր ավտովթար Կոտայքի մարզում, կան վիրավորներ, իսկ ճանապարհն սպասարկող ընկերությունը «մատը մատին չի խփել». ի՞նչ են մտածում պատկան մարմինները (ՖՈՏՈ, ՏԵՍԱՆՅՈՒԹ)

Այսօր՝ հունվարի 28-ին, խոշոր ավտովթար է տեղի ունեցել Կոտայքի մարզում։

Ինչպես դեպքի վայրից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, ժամը 08.00-ի սահմաններում Երևան-Սևան ավտոճանապարհի 39-րդ կմ–ում՝ ճանապարհային ոստիկանության նախկին հենակետի դիմաց, իրար են բախվել Սևան քաղաքի բնակիչ 56-ամյա Մերուժան Ստեփանյանի վարած «Ֆորդ Տրանզիտ» մակնիշի 20 ՏՏ 729 համարանիշի և Կոտայքի մարզի Ալափարս գյուղի բնակիչ 43-ամյա Անաստաս Պետրոսյանի վարած «Գրենդել» մակնիշի տրակտորը։

Վթարի հետևանքով «Ֆորդ Տրանզիտ»-ի ուղևորներ Սևան քաղաքի բնակիչներ 44-ամյա Սոնիկ Գալստյանը, 34-ամյա Գեղեցիկ Ավետիսյանը, 47-ամյա Թորգոմ Մարգարյանը, 32-ամյա Էվելինա Գրիգորյանը, 48-ամյա Ալինա Սարգսյանը մարմնական վնասվածքներով տեղափոխվել են Հրազդանի քաղաքային հիվանդանոց։

Ֆոտոլրագրողը հայտնում է, որ վթարի պատճառը եղել է ճանապարհի մերկասառույցը, քանի որ ճանապարհը մաքրված չէր, հեռացված չէր ձյունը և ցանված չէր անհրաժեշտ աղն ու ավազը, իսկ նշված աշխատանքները պետք է կատարեր սպասարկող կազմակերպությունը, որը հանդիսանում է «Հրազդանի ճանշին»-ը։

Դեպքի վայրում հավաքված մարդիկ արդարացիորեն դժգոհում էին, որ սա առաջին դեպքը չէ, որ այս հատվածում աշխատանքներ չեն կատարվում, ինչն էլ հանդիսանում է վթարների, երբեմն ողբերգական ավարտ ունեցող դեպքերի։ Տեղում աշխատանքներին հետևելու համար վթարի վայր էին ժամանել Կոտայքի մարզպետ Կովալենկո Շահգալդյանը, ոստիկանության Կոտայքի մարզային վարչության պետ, ոստիկանության գնդապետ Գրիշա Ամիրխանյանը։

Ժամանել էին նաև ճանապարհային ոստիկանության 2-րդ սպայական գումարտակի 3-րդ վաշտի աշխատակիցները՝ վաշտի հրամանատար Արսեն Գրիգորյանի գլխավորությամբ։ Վթարի վայրում քննչական աշխատանքները ղեկավարելու համար ժամանել էին ոստիկանության քննչական գլխավոր վարչության Կոտայքի մարզի քննչական բաժնի քննիչները՝ բաժնի պետի տեղակալ Մհեր Ներսիսյանի գլխավորությամբ։ Քննիչ Արման Հարությունյանի հանձնարարականով ավտոմեքենաները տեղափոխվում են ոստիկանության Կոտայքի մարզային վարչության տուգանային հրապարակ։

Փաստի առթիվ քննչական բաժնում նյութեր են նախապատրաստվում։

Ֆոտոլրագրողը հայտնում է նաև, որ մինչ վթարի վայրում քննիչները քննչական աշխատանքներ էին կատարում, մերկասառույցի պատճառով տեղի ունեցան հերթական վթարները։ «Տոյոտա Պրադո» մակնիշի 08 ՏՏ 503 համարանիշի ավտոմեքենան բախվեց «Գազել» մակնիշի 739 ՍՏ 34 համարանիշի ավտոմեքենային, իսկ մեկ այլ «Գազել» մակնիշի 30 ՏՍ 669 համարանիշի ավտոմեքենան էլ բախվեց «Զիլ» մակնիշի 04 ՏԼ 437 համարանիշի ավտոմեքենային։

Բարեբախտաբար, այս 2 վթարների դեպքում զոհեր և վիրավորներ չկան։ Վարորդները հարց էին ուղղում թե՝ «հույս չունենք, որ ճանապարհը կմաքրվի, հեսա արևը դուրս կգա, ձյունը կհալի, ճամփեքը կբացվի, իսկ իրանք էլ մի կլորիկ գումար դուրս կգրեն, թե իբրև՝ կատարել ենք ձնահեռացման աշխատանքներ»։

Լուսանկարները և տեսանյութը` Գագիկ Շամշյանի:

{gallery}shamshyan/28-01-1{/gallery}