Հայկավան գյուղում վնասազերծվել է հերթական գայլը. պատկան մարմինները տեղներից «ժաժ չեն գալիս» (ՖՈՏՈ)

Այսօր՝ հունվարի 28-ին, արտակարգ դեպք է տեղի ունեցել Արմավիրի մարզում։

Ինչպես դեպքի վայրից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, Արմավիրի մարզի Հայկավան գյուղի բնակիչ 28-ամյա Արմեն Զաքարյանը, ով 4 տարի է նաև զբաղվում է որսորդությամբ Հայկավան գյուղի «Թափաբլուր» սարում կարողացել է վնասազերծել գայլի։ Գայլը էգ է։ Գյուղացիները ֆոտոլրագրողին պատմել են. «Արմենը տանն էր, երբ իր որսորդ ընկերները զանգել են, թե՝ «զենքդ վեկալ ու շուտ արի «Թափաբլուր»։ Գելը վրայա տվել Մամեյի հոտին։ Արմենը, իր որսորդ ընկերների՝ Թաթուլի, Քաջիկի հետ հասել է «Թափաբլուր», բայց գելն արդեն փախել էր։ Փախնելուց առաջ գելը վնասել էր Մամեյի գառներից մեկի կոկորդը»։ Մինչ որսորդները Մամեյի ու գյուղի ժողովրդի հետ քննարկում էին, թե «ոնց եղավ, թե էս էլ 2-րդ անգամ գելը վրա տվեց», Արմենն այդ ընթացքում առանձնանում և կարողանում է դուրս գալ գելի հետքի վրա։ Արդեն հոտից 100 մետր հեռավորության վրա Արմենը նկատում է գայլին ու 2 կրակոցով գելին սատկացնում ու գյուղացիները կես-կատակ կես-լուրջ պատմում էին, որ Արմենը որձին խփեց անցյալ տարվա դեկտեմբերի 23-ին, իսկ էգին էսօր, «կարելի ա ասել Արմենը էգին իրանով արեց»։ Գյուղացիները պատմում էին նաև, որ այն հատվածում, որտեղ որ վնասազերծվել են գայլերը, այնտեղ դրա հարևանությամբ է գտնվում 3 գյուղերի՝ այդ թվում Հայկավանի, Արմավիրի և Ջրաշենի գերեզմանատները և ոչ մի երաշխիք չկա, որ մարդիկ, գնալով գերեզմաններ, գայլերի կողմից հարձակման չեն ենթարկվի։

Ֆոտոլրագրողը հայտնում է, որ ՀՀ կառավարությունն անցյալ տարի ամպագորգոռ հայտարարություններ էր տարածում, թե այն որսորդները, ովքեր կվնասազերծեն գայլի, ապա որպես փոխհատուցում կստանան 100 հազար դրամ։ Սակայն, սա նույն որսորդի կողմից գայլի վնասազերծելու 2-րդ դեպքն է, իսկ կառավարությունն ու մարզպետարանն ասես «ուղտի ականջում քնած լինեն»։ Արմենի ընտանիքը բաղկացած է վեց շնչից, որից 3 հոգին հաշմանդամության թոշակ են ստանում, իսկ Արմենն էլ ունի 6 ամսեկան դուստր։ Հայրն ու մայրն էլ թոշակառու են։ Գյուղացիները պատմում էին, որ պետության գործն անում են անհատ մարդիկ, իսկ պետությունը խոսքը գործի չի վերածում։

Լուսանկարները` Գագիկ Շամշյանի:

{gallery}shamshyan/Gayl{/gallery}