Ավտովթար Էրեբունիում՝ կա 4 վիրավոր

Այսօր` հոկտեմբերի 21-ին, ավտովթար է տեղի ունեցել Երևանում:

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 10.30-ի սահմաններում Էրեբունի պողոտայի և Աթոյան փողոցի խաչմերուկում իրար են բախվել 1-03 ծառայության` շտապօգնության 008 ՏԼ 64 համարանիշի և «Ֆոլցվագեն Տուարեգ» մակնիշի 15 ՕՏ 108 համարանիշի ավտոմեքենաները:

Վթարի արդյունքում շտապօգնության ավտոմեքենան Էրեբունի պողոտայի հենց մեջտեղում կողաշրջվել է:

«Տուարեգի» ղեկին եղել է 35-ամյա Եվա Առաքելյանը, ով բժշկական օգնության չի դիմել:

Վթարի հետևանքով շտապօգնության ավտոմեքենայի վարորդը` 56-ամյա Հրաչիկ Հարությունյանը, բժիշկ 61-ամյա Բաղդասար Գևորգյանը և շտապօգնության մեքենայում գտնվող 24-ամյա Անի Շառոյանն ու նրա 1 տարեկան 3 ամսական դուստրը` Մարիա Պադորյանը, մարմնական վնասվածքներով տեղափոխվել են հիվանդանոց:

Շտապօգնությունը երեխային տեղափոխելիս է եղել հիվանդանոց:

Այս պահին դեպքի վայր են ժամանել Երևանի Ճանապարհային ոստիկանության աշխատակիցները:

Դեպքի վայր են ժամանել նաև Արտակարգ իրավիճակների նախարարության Հայաստանի փրկարար ծառայության Երևանի փրկարարական վարչության հատուկ փրկարար ջոկատի փրկարարները:

Դեպքի վայրում քննչական աշխատանքները ղեկավարում է ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Արթուր Գեսոյանը:

Նրա հանձնարարականով մեքենաները տեղափոխվում են Երևանի ՃՈ տուգանային հրապարակ:

Լուսանկարները և տեսանյութը` Գագիկ Շամշյանի