«Տոյոտա Պրադո»-ն վրաերթի է ենթարկել 15-ամյա աշակերտուհուն (ֆոտո, տեսանյութ)

Երեկ՝ հոկտեմբերի 21-ին վրաերթ է տեղի ունեցել Երևանում:

Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 15.30-ի սահմաններում Տիգրան Մեծի 25 շենքի դիմաց 26-ամյա Նարեկ Սաֆարյանը, վարելով «Տոյոտա Պրադո» մակնիշի 37 ND 777 համարանիշի ավտոմեքենան, վրաերթի է ենթարկել Երևանի թիվ 19 միջնակարգ դպրոցի 11-րդ դասարանի աշակերտուհի, 15-ամյա Քրիստինե Վարդանյանին:

Վրաերթի ենթարկվածը մարմնական վնասվածքներով տեղափոխվել է «Մուրացան» բժշկական կենտրոն:

Ականատեսները ֆոտոլրագրող Գագիկ Շամշյանին պատմել են, որ վարորդը փախուստի չի դիմել և իր ավտոմեքենայով վրաերթի ենթարկված աղջկան տեղափոխել է հիվանդանոց:

Փաստի առթիվ ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի քննիչ Արթուր Գասոյանի նյութեր են նախապատրաստվում:

Քննիչի հանձնարարականով, մեքենան տեղափոխվել է Երևանի ՃՈ տուգանային հրապարակ:

Լուսանկարները և տեսանյութը՝ Գագիկ Շամշյանի