Ավտովթար` Երևան-Երասխ ավտոճանապարհին. ուղևորուհին տեղում մահացել է (ֆոտո, վիդեո)

Այսօր՝ հոկտեմբերի 23-ին, ավտովթար է տեղի ունեցել Արարատի մարզում: 

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 12.30-ի սահմաններում Երևան-Երասխ ավտոճանապարհի 33-րդ կմ-ին իրար են բախվել «ՎԱԶ 2106» մակնիշի 05 ՕԼ 927 համարանիշի և «ԳԱԶ 3110» մակնիշի 06 ՏԼ 012 համարանիշի ավտոմեքենաները:

Բախման հետևանքով «ՎԱԶ 2106» մակնիշի ուղևորուհին տեղում մահացել է:

Ֆոտոլրագրող Գագիկ Շամշյանը հայտնեց, որ «ՎԱԶ 2106»-ը վարել է Երևանի բնակիչ, 65-ամյա Զոհրաբ Մանուչարյանը, իսկ «ԳԱԶ 3110»-ը' Արարատի մարզի Արալեզ գյուղի բնակիչ, 19-ամյա Ոսկան Աղաբաբյանը:

Դեպքի վայր են ժամանել ոստիկանության Արարատի բաժնի օպերատիվ խումբը' Արարատի ոստիկանության պետի օպերգծով տեղակալ Աշոտ Մկրտչյանի գլխավորությամբ:

Դեպքի վայրում քննչական աշխատանքները ղեկավարել է ոստիկանության քննչական գլխավոր վարչության Արարատի քննչական բաժանմունքի քննիչ Վահե Զոհրաբյանը:

Նրա հանձնարարականով, ավտոմեքենաները տեղափոխվեցին ոստիկանության Արարատի բաժնի տուգանային հրապարակ:

Դեպքի վայրում երթևեկությունը կանոնավորելու համար այնտեղ էին ժամանել Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի աշխատակիցները' վաշտի հրամանատարի տեղակալ Տիգրան Գրիգորյանի և 2-րդ դասակի հրամանատար Անդրանիկ Շաղոյանի գլխավորությամբ:

Քննիչի հանձնարարականով, երկու վարորդները տեղափոխվել են բուժկենտրոն, որպեսզի պարզվի նրանց սթափության աստիճանը:

Դեպքի վայրում հավաքվածները ֆոտոլրագրող Գագիկ Շամշյանին հայտնել են, որ մահացածը Երևան քաղաքի բնակիչ, 58-ամյա Զոյա Սվարյանն էր, ով ավտոմեքենայի հետևում է նստած եղել, և վթարի պահին, երբ մեքենաները բախվել են իրար, նա իրեն դուրս է նետել ավտոմեքենայից. դեպքի հանգամանքները կպարզի քննչական մարմինը:

Լուսանկարները և տեսանյութը` Գագիկ Շամշյանի