Քաջարանում ամուսինները հրդեհից ծխախեղդ են եղել

Երեկ` հոկտեմբերի 23-ին, արտակարգ պատահար է տեղի ունեցել Սյունիքի մարզում:  Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 16.20-ի սահմաններում ոստիկանության Քաջարանի բաժանմունք հաղորդում է ստացվել, որ հրդեհ է բռնկվել Քաջարան քաղաքի Տերյան փողոցի 3-րդ շենքի բնակարաններից մեկում, որտեղ կան մահացած անձինք:  Շտապ դեպքի վայր են ոստիկանության Սյունիքի մարզային վարչության օպերատիվ խումբը` վարչության պետ Ավագյանի, բաժնի պետ Գևորգյանի գլխավորությամբ:  Նշված շենքի 20-րդ բնակարանում հայտնաբերվել են թոշակառու ամուսինների` 82-ամյա Արամայիս Գալստյանի և 76-ամյա Ռոզա Սարգսյանի մարմինները` մահացած վիճակում:  Ըստ նախնական տեղեկությունների` օպերատիվ-քննչական խումբը պարզել է, որ նույն օրը` ժամը 15.00-ի սահմաններում, հրդեհ է բռնկվել նշված բնակարանի խոհանոցում, որի հետևանքով թոշակառու ամուսինները ստացել են տարբեր աստիճանի մարմնական վնասվածքներ, ծխախեղդ են եղել և մահացել են:  Դեպքի վայր է մեկնել նաև Արտակարգ իրավիճակների նախարարության Հայաստանի փրկարար ծառայության Սյունիքի մարզի Կապանի հրշեջ-փրկարարական մեկ մարտական հաշվարկ:  Փաստի առթիվ ոստիկանության Կապանի քննչական բաժանմունքում նյութեր են նախապատրաստվում:  Քննիչի հանձնարարականով, նշանակվել են դիակների դատաբժշկական փորձաքննություններ: