«Վոլվո» մակնիշի բեռնատարը մերկասառույցի պատճառով շրջվել է. դեպքի վայրում միայն ՃՈ և փրկարար ծառայության աշխատակիցներն են (Թարմացված` ֆոտո, տեսանյութ)

Այսօր՝ դեկտեմբերի 21-ին, ավտովթար է տեղի ունեցել Արագածոտնի մարզում։

Ինչպես դեպքի վայրից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, ժամը 17.40-ի սահմաններում Երևան–Գյումրի միջպետական ավտոճանապարհի 68-րդ կմ-ին՝ Թալինի առաջին խաչմերուկում, «Վոլվո» մակնիշի VKN 777 համարանիշով բեռնատարի վարորդ Վրաստանի քաղաքացի Նոդար Կիչխելին շրջադարձի ժամանակ, ճանապարհի սառցակալման պատճառով կորցրել է մեքենայի կառավարումը և կողաշրջվել։

Այս պահին դեպքի վայրում են ճանապարհային ոստիկանության 2-րդ սպայական գումարտակի 2-րդ վաշտի 1-ին դասակի մեծ թվով աշխատակիցներ՝ հրամանատար Կարեն Աբրահամյանի և վաշտի հրամանատարի տեղակալ Սուքիաս Գրիգորյանի գլխավորությամբ։ Այստեղ են նաև Արտակարգ իրավիճակների նախարարության Հայաստանի փրկարար ծառայության Արագածոտնի մարզի Թալինի հրշեջ–փրկարարական ջոկատի աշխատակիցները՝ պետ Սևակ Ֆահրադյանի գլխավորությամբ։

Մի քանի րոպե առաջ, Գագիկ Շամշյանի խոսքերով՝ «ձնծաղիկների նման», հայտնվեցին աղ ցանող բրիգադները՝ դեպքը տեղի ունենալուց ժամեր անց։

Դեպքի վայրում հավաքված քաղաքացիներն արդարացիորեն բողոքում էին, որ Արագածոտնի մարզպետն ամպագորգոռ հայտարարություն էր արել, որ իր մարզում բոլոր ավտոճանապարհներն անցանելի են, սակայն քաղաքացիները ֆոտոլրագրող Գագիկ Շամշյանին պատմել են, որ ամեն անգամ վթարից հետո դեպքի վայր առաջինն են ժամանում ճանապարհային ոստիկանության փրկարար ծառայության աշխատակիցները, իսկ մարզպետարանի աշխատակիցները հայտնվում են վթարից ժամեր անց։

Լուսանկարները և տեսանյութը՝ Գագիկ Շամշյանի

{gallery}shamshyan/volvo-21.12.11{/gallery}