Սպանության փորձ Աշտարակում. հրազենային վնասվածքներով հիվանդանոց են տեղափոխվել ընտանիքի անդամներից երկուսը

Երեկ՝ դեկտեմբերի 25-ին, սպանության փորձ է տեղի ունեցել Արագածոտնի մարզում: Ինչպես ԼՈՒՐԵՐ.com-ին հայտնում է ֆոտոլրագրող Գագիկ Շամշյանը՝ ժամը 18:30-ի սահմաններում Աշտարակի բժշկական կենտրոնից ահազանգ է ստացվել ոստիկանության Աշտարակի բաժին, որ  մարմնական վնասվածքներով իրենց մոտ են տեղափոխվել Գագիկ, Հրանտ և Լիդա Շաբոյանները:

Հիվանադանոց են մեկնել ոստիկանության Արագածոտնի մարզային վարչության օպերատիվ խումբը՝ մարզային վարչության պետ Մարգար Մելքոնյանի և Աշտարակի ոստիկանության պետ Արթուր Արիսատկեսյանի գլխավորությամբ: Պարզվել է, որ նրանք հիվանդանոց են տեղափոխվել Աշտարակ քաղաքի Լինչի 22 տան մոտից:

Ֆոտոլրագրող Գագիկ Շամշյանը հայտնում է, որ Աշտարակում իրեն պատմել են, որ, երբ Գագիկ Շաբոյանը ցանկացել է մտնել տուն, այդ ժամանակ նրա վրա է հարձակվել հետևից ինչ-որ անձ և հարվածներ հասցրել նրան, և, երբ նրան օգնության են հասել հարազատները, այդ ժամանակ, անհայտ անձը կամ անձիք, դեռևս չպարզված հրազենով, կրակոցներ են արձակել նրանց ուղղությամբ, որի հետևանքով 2 հոգի ստացել են հրազենային վնասվածքներ: Ֆոտոլրագրող Գագիկ Շամշյանը հայտնում է, որ նշված անձիք զբաղվում են ոսկու առևտրով: Ժամանել էր նաև ՀՀ ոստիկանապետի առաջին տեղակալ Հունան Պողոսյանը, ով կատարվածի մասին հեռախոսով տեղեկացրեց ՀՀ ոստիկանապետ Վլադիմիր Գասպարյանին:

Փաստի առթիվ ոստիկանության քննչական գլխավոր վարչության Արագածոտնի քննչական բաժնում հարուցվել է քրեական գործ ՀՀ ՔՕ 34-104 հոդվածի 2-րդ մասի 1 կետի և 235 հոդվածի 1-ին մասի հատկանիշներով: Դեպքի վայրում հայտնաբերվել արտասահմանյան մակնիշի հրազենից արձակված 2 պարկուճ: