Վթար-վրաերթ` Բաղրամյան պողոտայում. «Աուդի Ա6»-ի վրայից հանվել են համարանիշները. ոստիկանությունը փնտրում է վարորդին (ԼՐԱՑՎԱԾ՝ ՖՈՏՈ)

Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը՝ ժամը 23.30-ի սահմաններում Բաղրամյան 84 շենքի` «ՍԱՍ» սուպերմարկետի դիմաց «Աուդի Ա6» մակնիշի ավտոմեքենայի վարորդը վրաերթի է ենթարկել հետիոտնին, այնուհետև բախվել է թիվ 36 երթուղու «Զոնդ» մակնիշի ավտոբուսին:

 

Վրաերթի ենթարկված հետիոտնը, ով փողոցն անցնելիս է եղել չթույլատրված հատվածով, դեպքի վայր ժամանած շտապօգնության ավտոմեքենայով տեղափոխվել է «Արմենիա» բժշկական կենտրոն:

 

Մինչ դեպքի վայր կժամանեին Ճանապարհային ոստիկանության աշխատակիցները, «Աուդի Ա6»-ի վրայից հանվել էին համարանիշները:

 

Այս պահին դեպքի վայրում քննչական աշխատանքները ղեկավարում է ոստիկանության քննչական գլխավոր վարչության Երևանի քննչական վարչության Ճանապարհատրանսպորտային հանցագործությունների քննության բաժնի ավագ քննիչ Արտաշես Վանյանը:

 

Նրա հանձնարարականով, ավտոմեքենան տեղափոխվում է Երևանի ՃՈ տուգանային հրապարակ: 

 

Այս պահին ոստիկանությունը ձեռնարկում է օպերատիվ-քննչական գործողություններ` պարզելու համար վրաերթի ենթարկված կնոջ և վրաերթ կատարած վարորդի ինքնությունը:

Լուսանկարները` Գագիկ Շամշյանի

{gallery}shamshyan/Audi-aranc-hamar{/gallery}