Սևանի ոստիկանները հայտնաբերել են սպանության փորձ կատարողին (ՖՈՏՈ, ՏԵՍԱՆՅՈՒԹ)

Երեկ՝ հունվարի 7-ին, ոստիկանության Սևանի բաժնի աշխատակիցները հայտնաբերել են հետախուզվող 40-ամյա Յուրի Մուրադյանին։

Ինչպես Սևանից ԼՈՒՐԵՐ.com–ին հայտնում է ֆոտոլրագրող Գագիկ Շամշյանը, Յուրի Մուրադյանը՝ «Բիջ Յուրո» մականվամբ, ով նախկինում մի քանի անգամ եղել է դատապարտված, մեղադրվում է ՀՀ քրեական օրենսգրքի 34-104 հոդվածի 1-ին մասի (սպանություն) և 235 հոդվածի 1-ին մասի (ապօրինի եղանակով զենք ձեռք բերելը և պահելը) հատկանիշներով։

Ինչպես ավելի վաղ ԼՈՒՐԵՐ.com–ին հայտնել էր ֆոտոլրագրողը, այս տարվա հունվարի 4-ին՝ ժամը 20.30-ի սահմաններում, Սևան քաղաքի Հրազդան փողոցի թիվ 38 տան մոտ կենցաղային հարցերի շուրջ տեղի ունեցած վիճաբանության ժամանակ Յուրի Մուրադյանը կյանքից զրկելու դիտավորությամբ, ապօրինաբար ձեռք բերված, իր մոտ գտնվող ինքնաշեն թմբուկավոր ատրճանակից կրակել էր Գեղարքունիքի մարզի Շորժա գյուղի բնակիչ Վիգեն Մարգարյանի կրծքավանդակին։

Կրակոցն արձակելուց հետո Յ. Մուրադյանը, իր կամքից անկախ հանգամանքներում, հանցագործությունն ավարտին չի հասցնում և դեպքի վայրից դիմում է փախուստի։ Նույն օրը դեպքի վայր ժամանած ոստիկանության Գեղարքունիք մարզային վարչության և Սևանի բաժնի օպերատիվ-քննչական խումբը դեպքի վայրում հայտնաբերում է չկրակված մեկ փամփուշտ, իսկ հիվանդանոց մեկնած Սևանի ոստիկանները պարզում են, որ, այնուամենայնիվ, տեղեկությունն այն մասին, որ հիվանդանոցում կա հրազենային վնասվածքով քաղաքացի, չի համապատասխանում իրականությանը, և նույն պահին Գեղարքունիքի մարզի ոստիկաններն օպերատիվ մի քանի խմբերով փորձում են ճշտել վիրավորի գտնվելու վայրը։ Որոշ ժամանակ անց Սևանի ոստիկանները նրան հայտնաբերում են Շորժա գյուղում՝ հրազենային վնասվածքով, և, ոստիկանների միջամտությամբ, լուրջ վնասվածք ստացած Վ. Մարգարյանը տեղափոխվում է հիվանդանոց։

Հունվարի 5-ին փաստի առթիվ հարուցվում է քրեական գործ։ Վիճաբանության վայրում հավաքվածները ֆոտոլրագրողին պատմել են, որ «բակում լսեցինք վիճաբանության ձայներ և մեկ կրակոց»։ Այս պահին ոստիկանության քննչական գլխավոր վարչության Սևանի քննչական բաժանմունքի ավագ քննիչ Վահագ Ղարիբյանի որոշմամբ Յու. Մուրադյանը ձերբակալվել է և գտնվում է ոստիկանության Սևանի բաժնի ձերբակալվածների պահման վայրում։ Սևանի ոստիկանների բացատրական աշխատանքի շնորհիվ Յու. Մուրադյանը ներկայացրել է նաև թմբուկավոր այն ինքնաշեն ատրճանակը, որով կատարել էր հանցագործությունը։ Քննիչի որոշմամբ նշանակվել են մի շարք փորձաքննություններ։

Լուսանկարները և տեսանյութը՝ Գագիկ Շամշյանի

{gallery}shamshyan/Sevan-spanutyun{/gallery}